Ny Tompo no nanorina ny fiangonana CFC tao Bangalore ny volana Aogositra
1975. Niantomboka tamin'ny mpino vitsivitsy izany. Tamin'ny voalohany dia
tsy nazava tsara taminay loatra izay tanjon'Andriamanitra momba ny
fivorianay. Kanefa naposany tsikelikely taminay ny fikasany.
Toy izao izany : manaporofo sy mitory ny divay vaovao ao anaty siny hoditra
vaovao (divay vaovao : fiainan'i Jesosy sy toetran'Andriamanitra) (siny
hoditra vaovao : ny fiangonana, Tenan'i Kristy, naorina araka ny
rindran-damin'ny Fanekena Vaovao).
Dia izay no lasa fahitanay
Ny Fiantsoana Manokana
Ny mpaminany rehetra tao amin'ny Testamenta Taloha dia samy nandray
fahitana mazava avy tamin'Andriamanitra. Fahitana tsy maintsy notoriany
tamin'ny zanak'Israely, ary izay ihany no notoriany. " Entan'i Jehovah " no
niantsoany azy. Ireo mpaminany rehetra dia nahafantatra ny asa
nanirahan'Andriamanitra azy. Nifantoka tamin'izany entana
napetrak'Andriamanitra tao ampony izany izy ireo, izay nataony
laharam-pahamehana.
Ny fiangonana CFC koa dia nandray fahitana mazava avy amin'Andriamanitra
momba ny fiantsoana azy. Mba hanao ny asan'ny mpaminany eto Inde. Ary
nataonay izany araka izay tratry ny ainay nandritra ireo taona maro lasa ka
tsy variana tamin'ny zavatra hafa izahay.
Ny Tompo dia naniraka misionera marobe nankaty Inde. Dia niteraka
fifohazam-panahy taty amin'ny taninay izany nandritra ny roanjato taona.
Notoriana tamin'izany ireo fahamarinana ara-Baiboly maro mba hitondra ireo
tsy mpino ho an'i Kristy. Derainay ny Tompo ny amin'izy rehetra ireny.
Mbola misy anefa ireo fahamarinana ao amin'ny Testamenta Vaovao izay
tsapanay fa tsy nohamafisin'izy ireo.
Ireto avy ireo fahamarinana tsy nohamafisiny tao amin'ny Fanekena Vaovao :
Ireo takian'i Jesosy amin'izay te ho mpianany, ny fiadanam-po noho ny
fahafantarana an'Andriamanitra ho Ray, ny fanarahana ny dian-tongotr'i
Jesosy, ny herin'ny Fanahy Masina miboiboika avy ao anatintsika, ny
fahafahantsika mandray ny toetran'Andriamanitra ao anatintsika, ny
fitondrana ny hazo fijaliana, ny fandresena ny fahotana izay mbola
ilomanosana, ny fahafahana amin'ny fitiavana izao tontolo izao sy ny
fitiavam-bola, ny fahafahana amin'ny fahakiviana sy ny tahotra ary ny
ahiahy, ny fankatoavana tanteraka ny toriteny teo an-tendrombohitra (Matio
5,6 ary 7), ny finoana fa hataon'Andriamanitra amintsika izay rehetra
nataony tamin'i Jesosy, ny fanorenana ny fiangonana ho Tena iray, sns…
Navesatra tao am-ponay fiangonana CFC ny nanaparitaka ireo fahamarinana
ireo tany amin'ny fiangonana hafa taty Inde. Nomen'Andriamanitra fahafahana
izahay nanaovanay izany, tamin'ny alalan'ireo fivoriana ho an'ny daholobe,
ireo fihaonambe, ireo radio sy ny asa soratra, ary koa tamin'ny alalan'ny
fanaparitahana kasety, Cd, Dvd anarivony maro.
Kanefa ireo mpitarika tao amin'ny ankamaroan'ny fiangonana dia nanohitra
anay sy ny teny torianay, ary nanakatona ny varavarana.
Koa dia nanao fahagagana Andriamanitra. Nosokafany ho anay ny varavaran'ny
internet. Napetrakay tao ny toriteny anjatony maro, tamin'ny alalan'ireo
rahalahy mahafatrapo izay nentin'Andriamanitra tato amin'ny fiangonana.
Mpino marobe avy any amin'ny fiangonana manarena ny Inde sy izao tontolo
izao no nirongatra nihaino ny toriteny. Fiainan'olona marobe no voaova,
fanambadiana maro no sambatra, fiangonana vaovao betsaka no teraka ary ny
sasany tamin'izy ireny dia naniry hifandray akaiky tamin'ny fiangonana CFC.
Dia nodinganin'Andriamanitra ireo mpitarika fiangonana nanidy trano ireo.
Ireo mpikambana tao aminy izay nangetaheta kosa dia nandray ny fahamarinana
tamin'ny alalan'ny internet. Amin'izao fotoana izao dia mpino marobe avy
amin'ny fiangonana manerana izao tontolo izao no voakasik'ireo fahamarinana
mahafinaritra ireo sady mitory amin'ny hafa mihitsy koa. Derainay
Andriamanitra noho izany satria izany mihitsy no efa nivavahanay sy
nirinay. Sombiny ihany izany tamin'ny tanjon'Andriamanitra ho an'ny CFC.
Mahagaga loatra ny lalan'Andriamanitra. Manao fahagagana izy rehefa tsy
mikatsaka afa tsy ny voninahiny isika sady tsy mitady izay ho an'ny
tenantsika.
Paoly dia nilaza fa ny tanjony dia "hanolotra ny olona rehetra ho tanteraka
ao amin'i Kristy ", koa niasa mafy izy hahatratrarany izany tanjona izany
(Kolo 1:28-29). Dia izay koa ny tanjonay. Miezaka izahay voalohany
indrindra mba hahatonga ny mpiangona tsirairay ho mpianatr'i Jesosy : mba
ho tia an'i Jesosy mihoatra noho ireo olon-tianay, mihoatra noho ny tenany
ary mihoatra noho ny fananany rehetra eto an-tany (Lioka 14:26,27). Avy eo
dia ampianarinay izy rehetra hankato izay REHETRA nandidian'i Jesosy (Matio
28,20).
Fantatray fa lalana ety izany ka vitsy no hahita azy. Fantatray koa fa na
tao amin'ny " fiangonan "'i Jesosy aza dia nisy mpihatsaravelatsihy
anankiray tao amin'ireo roambinifolo. Koa inoanay fa hisy
mpihatsaravelatsihy foana ato amin'ny CFC mandra-piverin'i Kristy. Kanefa
tsy amelanay izy ireny, amin'ny alalan'ny fitoriana ny Teny, raha tsy
voaheloka ka tsy hahazo aina ato am-piangonana, antenaina anefa fa mbola
hibebaka izy ireny.
Asa fitoriana sy Fanaovana ny olona ho Mpianatra
Ato amin'ny CFC izahay dia mamporisika ny mpino rehetra hizara ny
filazantsara amin'ny olom-pantany. Ary toy izany no nahazoanay olona marobe
ho an'i Kristy izay nanamaro isa ny mpiangona tao anatin'ny taona maro. Ary
toy izany koa no nananganan'Andriamanitra fiangonana vaovao maro tany
amin'ireo tanan-dehibe sy tanana kely taty Inde sy tany amin'izao tontolo
izao.
Satria manana antso manokana avy amin'Andriamanitra ny fiangonana CFC dia
tsy mirotsaka amin'ny asa fanompoana hafa (asa sosialy) izay mety handany
ny hery tokony hanaovanay izay niantsoana anay. Tsy tianay ny hilazana
amin'ny andro farany fa " ny tanimboaloboky ny hafa no nandrasanay kanefa
ny tanimboaloboka nomen'Andriamanitra anay tsy mba nandrasanay " (Tononkira
1 : 6). Noho izany dia avelanay ireny asa ireny ho an'ireo olona izay
mahatsapa fa nantsoin'Andriamanira hanao an'izany. Miaiky izahay fa
nomen'Andriamanitra antso samy hafa ny zanany tsirairay. Tsy maniry "
hampifandanja " ny asan'Andriamanitra sy ny asa sosialy eo imason'ny
mpivavaka hafa izahay. Ny zavadehibe aminay dia ny antson'Andriamanitra sy
ny fankasitrahan'Andriamanitra anay.
Satria izahay fiangonana mitombo, dia manana andraikitra lehibe amin'ireo
mpino vao tonga, sy amin'ireo ankizy lehibe tato aminay. Izy rehetra ireny
dia tokony ho tonga mpianatra avokoa. Ny fisian'ny mpino vaovao sy ankizy
efa lehibe dia mariky ny fiangonana salama sy mitombo. Ny mpino vaovao izay
nentin'Andriamanitra ato aminay ary ireo ankizy efa lehibe ireo izao no
tanimboaloboka vaovao andrasanay.
Andriamanitra sy Vola
Ato amin'ny CFC dia tena hentitra izahay amin'ny resaka vola, satria Jesosy
efa niteny fa tsy mahay manompo Tompo roa ny olona (Lioka 16,13), ary
izahay dia efa nanapakevitra hanompo an'Andriamanitra irery ihany. Mba tsy
hisy afaka hanome tsiny anay amin'ny resaka vola dia nampiharinay ireto
fitsipika ireto amin'ny fanaovanay ny asan'Andriamanitra : nanapakevitra
izahay fa tsy misy mandray karama ny mpanompon'Andriamanitra rehetra ato
amin'ny fiangonana, ary tsy manao rakitra sady tsy manao adidy ato
am-piangonana. Izahay dia hitory hanohitra ny fandoavana fahafolonkarena,
izay lalàna tamin'ny fanekena taloha. Hotorianay fa ny fanomezana vola ho
an'ny asan'ny Tompo dia tsy maintsy atao an-kafaliana sy an-tsitrapo
tanteraka. Tsy hoterenay hanome vola ny olona. Tsy handefa tatitra momba ny
asanay izahay ary tsy havelanay hisy hahafantatra izay vola ilain'ny
fiangonanay. Toherinay ny fangatahana sy ny fandraisana doty (fanambadiana)
ary hamporisihanay ny olona rehetra mba ho afa-trosa (Romana 13:8).
Noho ny fahasoavan'Andriamanitra dia voatazonay ireo fitsipiky ny Fanekena
vaovao ireo, hatrany amboalohany. Niatrika fanoherana sy fitsikerana maro
izahay avy amin'ny sokajim-piangonana maro hafa noho ny nijoroanay
tamin'ireo resaka ireo. Kanefa fantatray izay ijoroanay ary mbola
hijoroanay hatrany ireo mandra-piverin'ny Tompo.
Ny loholona rehetra ato aminay dia samy manana ny asa fivelomany manokana
avokoa, tahaka ny Apostoly Paoly. Tsy nandà ny fanomezana avy tamin'ny
mpino sasany Paoly, kanefa tsy nankininy tamin'ireny ny fiainany sy ny asa
fanompoany. Natoky izy fa ny Rainy izay any an-danitra no hanome izay
rehetra ilainy. Dia izany koa ny fahamarinana ijoroanay sady efa tafiditra
ao anatin'ny fahitanay rahateo.
Rariny tokoa raha tohanana ireo olona izay mirotsaka manao ny
asan'Andriamanitra, satria ny Tompo mihitsy no nandidy fa izay mitory ny
filazantsara dia hahazo fivelomana avy amin'ny filazantsara (1Kor 9:14).
Kanefa Paoly dia namelona ny tenany, satria hitany fa afa-baraka ny
anaran'ny Tompo tamin'izany andro izany noho ny fanangonan-karena
nataon'ireo mpitory teny nampiasa ny fanomezam-pahasoavana azony. Noho
izany dia te ho vavolombelona madio ho an'ny Tompo izy, tao anatin'izany
fahalovana izany.
Mitovitovy amin'izany koa ny zavamisy aty Inde. Koa ato amin'ny CFC dia
nahatsapa izahay (tahaka an'i Paoly) fa tsy te hitovy amin'ireo mpitory
mpanararaotra olona ireo, amin'ny resaka vola, mba ho fijoroana
vavolombelona ho an'ny Tompo eto amin'ny taninay. Sarotiny mihitsy izahay
amin'ny resaka vola ka izany no niaro anay tamin'ireo Balama sy Gehazy sy
Demasy marobe izay mety ho niaraka taminay ka ho nanimba ny
teni-vavolombelon'ny Tompo tao aminay.
Izahay tsy miteny amin'ny mpino ato amin'ny CFC ny amin'ny tokony
hampiasany ny volany. Malalaka izy ireo ny hampiasa ny volany araka izay
tiany, na hanohana asa misiona na fitaizana zaza kamboty, eny na dia hanome
ny mpangataka eny an-dalana aza. Kanefa ny fanomezana ho an'ny asan'ny
Tompo nomena ny CFC dia ampiasainay hifanaraka amin'ny fahitanay :
hahatonga ny olona ho mpianatra sy hanampiana ny mpianakavin'ny finoana
izay mandalo fahasahiranana (Gala 6:10).
Ministera, Anarana, Fahefana
Ministera : Ny Efesiana 4 : 11 dia milaza fa nomen'i Kristy olona manana
fanomezam-pahasoavana ny fiangonana : apostoly, mpaminany, evanjelistra,
mpampianatra ary mpiandry. Noho ny fitiavan'Andriamanitra dia misy ireo
ministera dimy ireo ato amin'ny fiangonana.
Kanefa tsy miantso ny rahalahy amin'ireo anarana na titra ireo izahay.
(Paoly dia niantso ny tenany hoe apostoly, mba haneken'ny olona fa
tenin'Andriamanitra ireo nosoratany. Tsy misy antony hiantsoana olona hoe
Apostoly intsony amin'izao andro izao).
Na izany aza dia mino izahay fa ilaina ny fisian'ireo ministera dimy ireo.
Nahazoanay vokatsoa marobe ny fisian'ireo ministera ireo teo aminay. Izany
no zavadehibe indrindra aminay fa tsy ilay olona nampiasain'Andriamanitra
akory, satria izahay rehetra dia Tena iray ihany ary mpanompon'ny namany
avy.
Anarana : ny anarana navelan'ny Tompo ananantsika dia " Rahalahy " ary "
Mpanompo " (Matio 23:8,11). Isika rehetra dia natao ho " rahalahy " sy ho "
mpanompo " avokoa.
Jesosy dia nilaza hoe rehefa vitanareo izay rehetra nandidiako anareo, dia
azonareo atao amin'izay ny miantso ny tenanareo hoe " mpanompo tsy mahasoa
izahay, ny tokony nataonay ihany no efa nataonay " (Lioka 17:10). Io ihany
no anarana tsy maintsy tsiriritintsika rehetra.
Fanekena Fahefana : Ny Baiboly dia mampianatra hoe " maneke ny mpitondra
anareo ka manoava azy " (Heb 13 : 17). Noho izany dia mampianatra ny olona
te hiditra ato amin'ny CFC izahay mba hankato io didin'Andriamanitra io ka
hanaiky ireo loholona amin'ny raharaha momba ny fiangonana. Tsy manery ny
olona hanaiky ireo loholona izahay, satria very ny hasin'ilay fanekena raha
tsy atao an-tsitrapo.
Any amin'ny fiangonana hafa dia terena hanaiky ny fahefan'ny Papa na ny
pretra na ny pastera ny olona. Fa ato amin'ny CFC kosa dia tsy mampihatra
fahefana amin'ny olona izahay. Malalaka ny mpino hifidy izay olona tiany
hankatoavina. Koa afaka mifidy izy ny loholona izay tiany hekena sy
ametrahany ny fitokisany, satria fahendrena sy fiarovana no tadiaviny
amin'izany fanekena izany. Ny fahatokisana ny loholona dia mihamitombo
arakaraky ny fijeren'ny mpino ny fomba fiainany, ny fomba fitaizany ny
ankohonany ary ny fankatoavan'Andriamanitra ny ministerany.
Tamin'ny andron'ny Apostoly, ny olona rehetra vao avy niova fo dia nanampy
isa ny fiangonana avokoa. Dia nanendry loholona (mihoatra ny iray)
isa-piangonana ny apostoly (Tit 1:5). Ny fiangonana tsirairay dia nahazo
loholona farafahakeliny anankiroa, mba hampifandanja ny ministera. Ireo
loholona ireo dia atao ho ray ara-panahy izay mitarika ny mpino sy manabe
azy ho tonga amin'ny fahamatorana. Ireo loholona ireo kosa indray dia
tarihin'ny apostoly na loholona efa antipanahy kokoa (raha tsy misy
apostoly). Izany rindran-damin'ny fanekena vaovao izany dia torinay any
amin'ny fiangonana rehetra mifandray amin'ny CFC koa.
Fananarana ny mpino sy ny loholona : Ao amin'ny ankohonana mendrika, ny ray
dia mananatra mafy ny zanany rehefa ilaina. Any amin'ny fiangonana rehetra
miaraka amin'ny CFC koa dia mino izahay fa ilaina ny fananarana mafy izay
olona mitohy manota foana (ampianarina ao Matio 18:15-17) amin'izay dia "
tsy hahazo ny vongana rehetra ny masirasira kely " (1 Kor 5:6,7).
Raha misy mpino roa na telo miampanga loholonan'ny fiangonana anankiray,
dia ny loholona zokiny (sy ireo manao ny asan'ny apostoly ao amin'io
fiangonana io) no manao famotorana momba ilay fiampangana. Raha hita fa
mitombina ilay izy dia harahin'izy ireo ny fampianarana nomena ao amin'ny
Timoty voalohany 5:19-21 :
" Aza mandray teny hiampangana loholona raha tsy misy vavolombelona roa na
telo, izay manota dia anaro eo anatrehan'ny olona rehetra mba hatahotra koa
ny sasany, … tsy manao olon-tiana na manao na inona na inona amin'ny
fiangarana"
Ampiharina izany fananarana mafy izany ary tsy atao amin'ny fiangarana. Ny
loholona dia hahazo fananarana mifanaraka amin'ny fahadisoana nataony, ary
hampahafantarina ny fiangonana rehetra izany (araka ny ampianarin'io
andininy eo ambony io). (Misy ohatra iray amin'izany hitantsika tamin'ny
nitenenan'i Tompo ny apostoly Jaona mba hampahafantatra ny fiangonana
rehetra ny nananarany mafy ireo loholona niverin-dalana tao amin'ny
Apokalipsy toko 2 sy 3).
Amin'ny resaka fananarana ihany, raha misy rahalahy nomen'Andriamanitra
fahefana mba hanendry loholona any amin'ny fiangonana anankiray, izany
fahefana izany dia ahafahany mananatra sy manaisotra izany loholona izany
koa raha ilaina. Raha toa ka tsy misy manana fahefan'ny apostoly dia ny
loholona hafa ao amin'ilay fiangonana no mampihatra ny famaizana.
Na izany aza anefa dia tanterahina am-pitiavana avokoa ny fananarana
rehetra (tahaka ny ataon'ny ray), amin'ny fanantenana fa hiverina any
amin'ny Tompo sy ao amin'ny fiangonana ilay mpino (na loholona) amin'ny
farany (2 Kor 2 : 6-11).
Fifankatiavan'ny samy fiangonana
Ireo fiangonana mifandray amin'ny CFC dia tsy dénomination na
vomdrom-piangonana iray anarana. Izahay dia fiangonana mifankatia sy
miara-miasa satria manana fahitana mitovy. Tsy manana foibe izahay. Tsy
fidiana ny mpitarika. Tsy manana Mpitantana na Filoha. Tsy manana foibe
mpanaramaso ny fananan'ny fiangonana. Ny fiangonana tsirairay dia mahaleo
tena eo ambany fahefan'ny Tompo. Noho izany, ny loholona rehetra izay
notendrena dia tompon'andraikitra mivantana eo imason'ny Tompo aloha
voalohany indrindra (izany no rindran-damin'ny fanekena vaovao, araka ny
hita ao amin'ny Apok 1:20 hoe " eny an-tanan'ny Tompo ny kintana tsirairay
"). Tsy manana diosezy izahay na vondrom-piangonana iandraiketana " eveka "
tahaka ny fiangonana sasany. Tsy misy loholon'ny fiangonana iray misahana
fiangonana hafa. Ary tsy misy loholona voatery hanaiky loholona avy amin'ny
fiangonana hafa.
Ireo fiangonana natsangan'i Paoly dia tsy nataony ho tonga dénomination.
Toy izany koa ny fiangonana CFC sy ireo fiangonana mifandray aminy. Ny
fiangonana tsirairay avy izay natsangan'ny Tompo sy mifandray amin'ny CFC
dia mahaleo tena tanteraka ary samy tarihin'ny loholony avy. Tsy misy olona
manaramaso ireny loholona ireny na manoro azy izay tokony ataony. Ny Tompo
irery ihany no Lohany.
Ny loholona ao amin'ny fiangonana anankiray misedra olana dia mety
hangataka toro hevitra any amin'ireo loholona efa matotra kokoa any amin'ny
fiangonana hafa na any amin'ireo manao ny asan'ny apostoly. Tahaka izany
ireo mpino tao Korinto izay nitady fifandraisana tamin'i Paoly hanampy azy
amin'ireo olana natrehany. Ny toro hevitr'i Paoly no nanampy azy ireo
namahany ny olona tamin'izany fotoana izany.
Izahay dia te hanorina fifankatiavana amin'reo fiangonana mifandray aminay
mba hanamafy ny firaisanay amin'ny maha ankohonana iray ao amin'ny Tompo.
Anisan'ny antony hanaovanay fihaonambe miaraka amin'izy ireo matetika
izany.
Maha zavadehibe ny fiainam-pianakaviana
Ato amin'ny CFC dia zavadehibe faratampony ny fivavahana ao ankohonana. Koa
manao fivoriana matetika izahay hampaherezana ny fianakaviana hisian'ny
fifandraisana mendrika eo amin'ny mpivady, hifankatia sy hifanaja ary
hanabe ny zaza amin'ny fahatahorana an'Andriamanitra.
Ny vehivavy dia nataon'Andriamanitra ho mpanampy ny vadiny. Ato amin'ny CFC
dia omenay lanja be ny fanampian'izy ireo ny vadiny amin'ny fitaizana ny
ankohonana sy amin'ny asa fanompoana ataony. Izahay dia mampianatra ny
lehilahy rehetra ho tonga mpiandry tsara ho an'ny vadiny, ka hialoha azy
mba ho halainy tahaka amin'ny sehatra rehetra.
Ary satria mahazo maminany koa ny zavakavavin'Andriamanitra, dia
mamporisika ny anabavy rehetra ato amin'ny fiangonana CFC izahay mba ho
feno ny Fanahy Masina sy haniry fatratra ny haminany (Asa 2:17 ; Efe 5:18 ;
1 Kor 14:1). Izany hoe, hizara famporisihana sy fampiononana hampandroso ny
hafa (araka izay vakiana 1 Kor 14;3). Voalohany indrindra aloha ao
an-tokantranony, ho an'ny vady aman-janany, avy eo ho an'ny vehivavy hafa.
Mpitarika ny CFC ao afara
Amporisihanay ny rahalahy tanora rehetra mba tsy hiroa fo, mba
homen'Andriamanitra fahasoavana ho tonga mpitarika fiangonana amin'ny andro
ho avy.
Ny fialonana dia olana lehibe tsy niala teo amin'ny tantaran'olombelona.
Kaina dia nialona an'i Abela zandriny, ary Saoly dia nialona an'i Davida
tanora. Ny tantaran'ny kristiana koa dia ahitana ohatra milaza "rahalahy
zokiolona" izay nialona zandry vao misandratra kanefa manan-talenta kokoa
ary dia nanilika azy ireny. Ato amin'ny CFC kosa anefa dia amporisihinay ny
loholona hitady lehilahin'Andriamanitra tanora izay manana toetra azo atao
mpitarika olona ary hamporisihanay ny loholona hanofana azy ireny koa.
Ary satria tsy misy fisotroana ronono amin'ny fanaovana ny
asan'Andriamanitra, ny loholona ato amin'ny CFC dia tsy mitsahatra miasa
mihitsy. Kanefa tahaka ireo raim-pianakaviana efa nahalehibe " zanakalahy
", ka misintona sy mamela ireo " zananilahy " hitantana ny fiainany. Ny
loholona zokiny ato amin'ny CFC koa dia manao toy izany. Ireny loholona
zokiolona ireny dia tahaka ny Ray, feno fanetrentena sy fatahorana
an'Andriamanitra ka dia hajain'ireo zanany arapanahy sy tiaviny ary hakany
hevitra mandrapahafatiny.
" Endre tsara sady mahafinaritra raha ny mpirahalahy no miara-monina…. Fa
voadidin'i Jehovah ho eo ny fitahiany, dia fiainana ho mandrakizay "
(Salamo 133 : 1,3).
" Tandremo ny fanompoana izay noraisinao tamin'ny Tompo mba
hahatanterahanao izany " (Kol 4:17).
